Radio RM FM اسمعنا على موجات الأثير 99.8 FM
مقالات مشابهة
نشر والد الطالب فارس خالد تدوينة على صفحته الخاصة على موقع فايسبوك نعى من خلالها ابنه الراحل
بسم الله الرحمان الرحيم الحمدالله
“و وبشر الصابرين الذين إذا أصابتهم مصيبة قالوا إنا لله وإنا إليه راجعون”
أنا والد المرحوم فارس خالد… أو بالأحرى، صاحبو، خوّه، ظلّه، وقطعة من قلبه… فارس ما كانش مجرد ولدي، كان روحي تمشي على الأرض، حتى ساعات نخاف عليه من ظلّه… من كثر ما نحبّه.
نتوجه بالشكر لكل من عزاني في مصابنا الجلل و لكل من واساني سوا بكلمة،بحضور او حتى بدعاء، كما اشكر شكرا خاصا زملائي ، اعوانا و اطارات وقيادات بوزارة الداخلية على الوقوفة الحاسمة التي قدمت من طرفهم في محنتي.
و شكرا لسفارة فلسطين بتونس و اخواتنا الفلسطينين جميعا ، وزارة التعليم العالي ، جامعة منوبة ،أصدقاؤه ،زملاءه على وقفتكم و دعمكم.
حبيت نحكيلكم شوية على فارس،ولدي اللي ربيتو انا كإطار امني على حبو للوطن وتضحيتو في سبيلو و انصافو للحق..كان شاب تونسي محب للحياة ،دارس تصميم صور ،رياضي من صغرو و مارس الملاكمة في الجمعية العسكرية بباردو ، وكان فنان ،مارس فنون المسرح في المركب الثقافي بالمنزه و مغروم بالرسم.ناشط جمعياتي ب Leo club carthage, Sunshine و Interact club amilecar Sidi boussaid وما يفلت حتى فرصة باش يكون سبب يقدم فيه الخير للناس ,اليوما ربي اختبرني فيه ،وانشالله يتقبلو من شهداءوه .
ولدي اللي ماكنتش نفارقو ،الصاحب اللي اختارهولي ربي ، بارا بوالديه و صاحبا لأخته.
فارس كان مؤمن صادق ،محافظ على صلاواتو .و كيف كل شاب حساس و موجوع على القضية الفلسطينية وسط ما شافناه من ابادة لاخواتنا الفلسطيين في المواقع الاجتماعية،كان يأمن انو عندو رسالة بصوت الشباب سلمية وعفوية قادر يعاون بيها اخواتنا في فلسطين من غير حتى اديولوجيا سياسية، مهما كان نوعها إلا حبو لبلادو و حرقتو على القضية الفلسطينية.
ومن حماسو مرقدش ليلة المسيرة اللي كانت مبرمجة لجميع الطلبة بالجامعات التونسية ، اختار ان يكون سبّاقا و بدون ضوضاء و يعلق العلم قبل وصول الطلبة،عملها موش باش يتصور .بل بكل ايمان و محبة و نصرة لاخواتنا في فلسطين.
مانجم نقول كان الحمدالله ،اليوم انا نكتب و عيني تدمع ،اما راسي مرفوع ،اللي جبت راجل و ربيتو على الصدق و الاستقامة وانا فخور بيه و اختارو ربي وهو ينصر في الحق،رافع راية القضية الفلسطينيه التي نالت مساندة تونس، الى اعلى هرم في السلطة.
نحتسبه عند الله شهيدًًا.
تحيا تونس..
تحيا فلسطين…
يذكر ان الطالب فارس خالد المرسّم بالسنة الأولى بالمدرسة العليا لعلوم وتكنولوجيات التصميم بالدندان،توفي إثر حادث أليم أثناء محاولته رفع علم دولة فلسطين.
و شيعت تونس امس الثلاثاء 8 أفريل 2025 جثمان الطالب فارس خالدالى مثواه الاخير بمشاركة عدد كبير من الطلبة ووفد من سفارة فلسطين
